крок

тлумачэнне слова:

  крок, -у, мужчынскі род
    1. Адзін рух нагой уперад, назад або ўбок, а таксама рух адной нагой уперад пры хадзьбе, бегу. Ступіць крок уперад. ▪ Байкоў усхапіўся з месца, зрабіў крок да дзвярэй. Шамякін. // толькі множны лік (крокі, -аў). Гукі, якія ўтвараюцца пры такіх рухах. Лабановіч пастукаў. У глыбі кватэры зараз жа грукнула крэслаў і пачуліся крокі. Колас.
    2. толькі адзіночны лік Тэмп руху пры хадзьбе (звычайна ў спалучэннях: «паскорыць крок», «суцешыць крок», «прыпыніць крок» і пад.). Праваднік прыкметна прыбавіў кроку, мы ледзь паспявалі за ім. Анісаў. // Пэўны від хадзьбы, руху. Спартыўны крок. Страявы крок.
    3. пераноснае значэнне; з азначэннем. Дзеянне, учынак. Рашучы крок. ▪ [Лютынскі:] Кожны няправільна зроблены намі крок сурова асудзіць гісторыя. Крапіва.
    4. пераноснае значэнне Этап у развіцці чаго-н. Новы крок у асваенні космасу. ▪ Вялікія крокі гісторыі складаюцца з асобных чалавечых намаганняў. «Звязда».
    5. Адлегласць паміж ступнямі ног пры хадзьбе як мера даўжыні. Змераць крокамі пакой. ▪ У двух кроках ад сябе нічога нельга было ўбачыць. Лынькоў.
    •••
    Гіганцкія крокі — прыстасаванне для гімнастычнай гульні ў выглядзе слупа з круцёлкай наверсе, да якой прымацаваны доўгія вяроўкі з лямкамі; седзячы ў лямках, гуляючыя разбягаюцца і, узлятаючы, кружацца вакол слупа.
    Адзін крок ад чаго — зусім блізка.
    За два (тры і пад.) крокі ад каго-чаго — паблізу, побач.
    Крок за крокам — а) паступова, няўхільна. Так крок за крокам упарта і настойліва ішоў.. [Серакоўскі] да сваёй запаветнай мэты — панесці сакрушальны ўдар па шпіцрутэну. Якімовіч; б) паслядоўна, адно за другім. Спасылаючыся на запісы ў дзённіку, Максім Лужанін крок за крокам узнавіў гісторыю стварэння «Адплаты». Казека.
    Крок наперад — пра тое, што з'явілася дасягненнем, прагрэсам у якой-н. справе.
    Крок у крок — тое, што і нага ў нагу (глядзі нага).
    Кроку не ступіць без каго-чаго глядзі ступіць.
    На кожным кроку — усюды і пастаянна.
    Не даваць кроку ступіць глядзі даваць.
    Ні на крок — а) ад каго-чаго нават на самую кароткую адлегласць (не адыходзіць, не адставаць). Антон не адставаў ад.. Амілі ні на крок. Чорны; б) ад каго-чаго нават на самы кароткі час, на маленькі тэрмін (не адпускаць, не адлучацца). — Толькі цяпер цябе ні на крок ад сябе не адпусці». «Звязда»; в) ніколькі не пасунуцца, не зрушыцца; не пасунуць, не зрушыць і пад. Справа не пасунулася ні на крок.
    Першы крок — самы пачатак пачатковы перыяд якіх-н. дзеянняў або якой-н. дзейнасці.
    Сямімільнымі крокамі — вельмі хутка (развівацца, пасоўвацца і пад.). Сівецкі сельсавет ішоў сямімільнымі крокамі да суцэльнай калектывізацыі. Зарэцкі.
    Што ні крок — скрозь, усюды.

Усталюйце новую праграму Скарніка!