укласці

тлумачэнне слова:

  укласці1, укладу, укладзеш, укладзе; укладзём, укладзяце, укладуць; закончанае трыванне, каго-што.
    1. Пакласці спаць. Пакуль Каця супакоіла дачку, накарміла яе і ўклала спаць, дык ужо добра і сцямнела. Гаўрылкін. / у паэтычнае слова ужываецца, ужыванне Спаць дзяцей уклаў Цёплы летні вечар. Гілевіч. // Уладкаваць на начлег, адпачынак. — А як жа ты [Рыгор] нас спаць укладзеш? — запытаў гаспадар. — Куды каго? Галавач. // Прымусіць або памагчы легчы. Утрох, з дапамогай Яругіна, .. [маёра] ледзьве ўклалі, і ён, знямогшыся, тут жа заснуў. Карамазаў. Старэйшая сястра Поля кінулася да .. [Сашы], абняла, памагаючы ўкласці на ложак. Шамякін.
    2. Пакрыць, услаць чым-н. паверхню чаго-н. Укласці стол кнігамі. Укласці дарожку каменнем. Укласці прызбу саломай. ▪ [Купчын:] — Што мы да гэтага рабілі? Бетон укладзём пад цэх — пайшлі далей. А цяпер і сцены будзем самі выводзіць, і аконныя пераплёты ставіць. Мыслівец.
    3. Палажыць у пэўным парадку, размясціць, скласці якім-н. чынам. Дастаў [бацька] .. смольны аскалёпак, пашчапаў яго на лучыны, якія потым акуратна склаў на спод грубкі, а наўкруг уклаў. «зрубам» абярэмак дроў. Масарэнка. // Змясціць куды-н., размясціць дзе-н. Усё гэта [прадукты] разам з шуфлямі і іншым начыннем ледзь уклалі ў вазок. Чарнышэвіч. // Прычасаць пэўным чынам валасы. Укласці косы вакол галавы.
    4. Укладваючы, складваючы, пабудаваць, зрабіць што-н. Укласці шпалы, Укласці трубы. ▪ Сонца ўжо садзілася за сасновы бор, калі ўклалі апошні кубаметр. Лукша.
    5. Палажыць, змясціць унутр. Следчы ўзяў .. астрожнае накіраванне, яшчэ нейкія паперы, усё гэта ўклаў у канверт і аддаў паліцыянту. Машара. // пераноснае значэнне Пранізаць, напоўніць што-н. якім-н. сэнсам, зместам, думкамі і пад. Столькі шчырасці хлопец уклаў у песню, што, здавалася, яна сама лілася з сэрца. «Маладосць». Пад такім доўгім .. празаічным загалоўкам нельга ўявіць таго зместу, які хочацца яму ўкласці ў свой твор. Якімовіч. // пераноснае значэнне Аддаць, прысвяціць каму-, чаму-н. (сілу, здароўе, жыццё і пад.). Ну хто, скажыце, адважыцца не даць кватэры начальніку аддзела капітальнага будаўніцтва, чалавеку, які, можна сказаць, кавалак жыцця ўклаў у гэты дом! Арабей. Мо таму ты [мама] так дрыжыш за сваіх дзяцей, што многа здароўя, сіл і ўсю душу ўклала ты ў іх. Дамашэвіч. Ён [Шайпак] у станцыю ўсё Сваё ўмельства ўкладзе, Каб стаяла, як лялька, Яна пры вадзе. Куляшоў.
    6. Аддаць на захаванне, выкарыстанне (грашовыя сродкі, капітал). Укласці капітал у цяжкую прамысловасць.
    7. размоўнае слова Забіць. [Макар Аўдзеевіч:] — Са сваёй стрэльбы я ўжо, хлопча, не аднаго звера ўклаў. М. Ткачоў.
    8. размоўнае слова грубае слова, грубы выраз З'есці. [Раўбіч:] — А потым зубр пайшоў за санкамі, і еў сена, пакуль не ўклаў усё. Караткевіч.
  укласці2, укладу, укладзеш, укладзе; укладзём, укладзяце, укладуць; закончанае трыванне, што.
    Стварыць, напісаць што-н., падабраўшы і аб'яднаўшы якія-н. матэрыялы. Укласці слоўнік. Укласці зборнік практыкаванняў.

Усталюйце новую праграму Скарніка!